Bèl kayimit, bèl marabou
yo ta pran tan di’w se Ameriken
men kouran ki travèse venn ou
san pou san Ayisyen
lejou zye’m te kontre pòtrè wou
lespri’m te deja soufle’m yon ti pawòl
ke douvan tout fanm kreyòl
ou se yon klète douvanjou
yon ti souri’w se sous ki fè lapli vini
andedan kè’m li antre pou fè tout tè sèch pati
si’m se yon nonm e wou se yon fanm
m pa wè sa’k manke pou nou pa ta pouse flanm
si tout sa ki rive’m ak fanm se devenn
jou nou te kontre a de se te fen lapenn
jou po kò’m ak kò’w te resi kwaze
sete kou syèl ak tè ki t’ap danse kole
dwèt men’m ki tap fè bèl kadans
sou ti po kò lis ou
se te tankou tanbou nan lakou souvnans
ki t’ap fè vètij anba dwèt mouche ogou
bèl kayimit, bèl marabou
o wi kwè’m si’w vle, ou te an trans
se te majik karès nou de sou balans lanmou
ki te kourone larèn anvi an abondans
manzè solèy ou ye, mwen pa pè proche’w
ti van fre ke’w ye, san pale mwen admire’w
ou se boukan dife pa pou mwen men pou zòt
paske lè nou de kontre nou len konn sekrè lòt
tankou yon ti kafe nwa cho koule san ma
k’ap karese gòj mwen nan tan lanèj sèl wa
se konsa m ta vle ye pou tout sezon Bondye fè
si tout fwa’m ta devni pou wou yon nonm ki chè
nan ti je koukouy ou sous bote kache
lè jou mwen va rive pou mwen ale
Bondye va kenbe je’m ak je’w de kote opoze
konsa ma va pa sonje gou lavi dèyè’m ki va rete
bèl kayimit, bèl Marabou
o wi kwè’m si’w vle, ou te an trans
se te majik karès nou de sou balans lanmou
ki te kourone larèn anvi an abondans.
Indi Ara Richard
2-23-2015
Note: “Like” nou sou Facebook: www.facebook.com/csmsmagazine
