Subscribe:Posts Comments

You Are Here: Home » Kreyol, News » Pou kisa ou jwenn mwen

pensive womanMwen t ap travèse lavi

San m pa t ap chèche w

Epi ou jwenn mwen.

Mwen te tankou yon ti grenn

ki pèdi anba tè lavi

kote soufrans fin antere l.

Kòm tout grenn dwe pouri anvan l jèmen

Men yon lè wè pa wè, fò li donnen!

Se konsa lè ou jwenn mwen

Ou reveye santiman m

ki te antere nan somèy dezespwa

vle pa vle kè m bat pou ou ankò

ou fè lanmou donnen nan kè m.

yo di se gout pa gout zwazo bwè lawoze

se fèy pa fèy chou palmis boujonnen

se ne pa ne yon bèl gòl kann pouse-

malgre solèy la konn wout la,

sa pran l tout yon jounen pou l rive janbe syèl.

Li te pran w tan-

Men ou jwenn mwen !

Depi ou jwenn mwen an-

Yon jounen san m pa tande w

Se tankou yon lalin ki pran yon etènite pou li nouvèl

Se tankou yon ti limyè zetwal ki pran syèk avan nou wè l.

Mwen menm ki t ap mouri grangou damou-

Ak tout santiman m ki te pèdi nan fènwa dekourajman

Ou jwenn mwen.

Se vre-ou ban m lespwa limyè

E sa fè m souri damou.

Chagrin m ale-

Plim mwen pap janm sispann ekri kòman m santi m

Paske w jwenn mwen !

 

Otè a :  Malisa Marcou

Miami 4/9/2015

Like us on Facebook : www.facebook.com/magazine

Tags

© 2015 CSMS Magazine · Subscribe:PostsComments · Designed by Theme Junkie · Powered by WordPress

© 2011-2017 CSMS Magazine All Rights Reserved -- Copyright notice by Blog Copyright